Sport Klub Tirana është një nga klubet më të dashur dhe më popullorë të Shqipërisë edhe më gjerë. Me performancën e tyre ekipet, sportistët, të cilët ndër vite janë stërvitur nën drejtimin e specialistëve të mirënjohur dhe nga më të shquarit në sportet tona, kanë bërë për vete me mijra sportdashës, dashamirës e miq kudo.Në historinë e tij një shekullore trofet, titujt, medaljet, kampionët e rekordmenët si brenda vendit edhe jashtë në arenën ndërkombëtare në nivel ballkanik e europian janë të shumtë e të pakrahasueshëm me asnjë klub tjetër shqiptar. Ndërkohë duhet të themi se këto arritje e suksese në mënyrë të padiskutueshme i kanë rrënjët në pasionin, talentin, përkushtimin, mundin e djersën që sportistët e sportistet bardheblu kanë derdhur pa u kursyer nëpër pista, pedana, poligone, tapete, ringje, zadra, parkete etj. Mund të themi se ushtrimi e zhvillimi i sporteve në Tiranë është i hershëm. Madje shumë më përpara se të themelohej KS Tirana. Kështu në vitin e largët 1908 mësohet se në një gazetë turke të kohës është botuar një ndeshje futbolli luajtur mes Kamzës dhe Tiranës në fermën së atdhetarit Refik Bej Toptani "Nderi i Kombit”.
Organizoheshin shpesh ngjitje në malin e Dajtit, në kalatë e Petrelës e të Prezës, apo bënin gara me biçikleta deri tek ura Beshirit, apo deri në Vorë e kthim etj. Grupet bojskautistë ishin të shumtë dhe veprimtaritë e tyre .Gjatë stinës së nxehtë të verës ushtronin notin nëpër pellgjet e Erzenit, Tërkuzës e Riglatës (lumi Tiranës), sidomos pellgjet e urës së Brrarit frekuentoheshin nga djemtë ,të cilët konkuronin në gara noti të stileve të ndryshme, si dhe në hedhje nga lartësitë e thepisura të shkëmbit
Një nga nismëtarët për krijimin e shoqatës "Fryma e re" në gjimnazin e shtetit bëhet Prof. Dr. Shefqet Ndroqi "Qytetar Nderi" i Tiranës bashkë më shokët e tij të ngushtë Dr. Isuf Dashi, Prof. Abdulla Shehri, Selman Stërmasi, Rexhep Maçi, Rexhep Luga etj. Kjo shoqatë kishte për qëllim zhvillimin e kulturës dhe sportit. Fill pas krijimit të grupit të teatrit ata formojnë skuadrën e futbollit, e cila shumë shpejt bëhet e njohur në gjithë qytetit. Bëhet fjalë për një grup djemsh të talentuar, që e luanin me shumë pasion futbollin të cilët në të parin kampionat të topkëmbës shqiptare u bënë baza kryesore e formacionit të skuadrës bardheblu të Sport Klubit Tirana
Kështu, gradualisht pas kësaj themelimi i Sport Klubit Tirana fillimisht u pa si një shkallë tjetër organizimi dhe e zhvillimit të veprimtarive sportive, të cilat duheshin çuar më tej në përballje, matje aftësisht e garimi, ashtu siç ndodhte me bashkëmoshatarët e tyre në mbarë Europën. Ndaj jemi të mendimit se pikërisht në këtë pikë kulmore të zhvillimit të veprimtarive sportive erdhi domosdoshmëri për krijimin i një jë klubi sportiv.